క్రెడిట్ కార్డులను వినియోగించి పెట్రోలును కొనుగోలు చేస్తే ఇన్నాళ్లూ లభిస్తున్న 0.75 శాతం క్యాష్బ్యాక్ అక్టోబరు ఒకటో తేది నుంచి ఉండబోదని కంపెనీలు ప్రకటించాయి. 2016లో పెద్ద నోట్లను రద్దు చేసిన తర్వాత డిజిటల్ చెల్లింపులను ప్రోత్సహించడానికి ప్రభుత్వం అనేక చర్యలు చేపట్టింది. ఇందులో భాగంగానే డిస్కౌంట్ ఇవ్వాలని చమురు కంపెనీలను కోరింది. దీంతో డిజిటల్ చెల్లింపులను ప్రోత్సహించడానికి 2016 డిసెంబరు నుంచి క్రెడిట్, డెబిట్, ఈ-వాలెట్ల ద్వారా పెట్రోల్, డీజిల్ కొనుగోలు చేసే వారికి 0.75శాతం డిస్కౌంట్ను క్యాష్బ్యాక్ రూపంలో ఇవ్వాలని చమురు కంపెనీలు క్యాష్బ్యాక్లను ప్రకటించిన విషయం తెలిసిందే. కాగా వచ్చే నెల ఒకటో తేది నుంచి ఆ డిస్కౌంట్ ఉండబోదని తాజాగా కంపెనీలు వెల్లడించాయి. ఇకమీదట డెబిట్, ఇతర డిజిటల్ పద్ధతుల ద్వారా చెల్లించేవారికి మాత్రం ఈ డిస్కౌంట్ యధావిధిగా కొనసాగుతుంది.
పాకిస్తాన్లో సంభవించిన భూకంపంలో పలువురు మరణించడంపై భారత ప్రధాని నరేంద్ర మోడీ దిగ్భ్రాంతి చెందారు. మృతుల కుటుంబాలకు మోడీ ప్రగాఢ సంతాపం తెలిపారు. ఈ మేరకు న్యూఢిల్లిలోని ప్రధాని కార్యాలయం ట్విటర్లో ఒక పోస్టుచేసింది. భారత్లోనూ, పాకిస్తాన్లోనూ భూకంపం సంభవించిందని, ఆస్తి, ప్రాణ నష్టాలు జరిగాయని తెలిసి తానెంతో బాధపడ్డానని మోడీ పేర్కొన్నారని ఆ ట్వీట్లో రాశారు. మృతుల కుటుంబాలకు సంతాపం తెలిపారని, గాయపడిన వారు త్వరితగతిన కోలుకోవాలని ఆకాంక్షిస్తున్నట్లు మోడీ అన్నారని ఆ ట్వీట్లో పేర్కొన్నారు. పాకిస్తాన్లో భూకంపం వల్ల 19 మంది మరణించారు. 300 మందికి పైగా గాయపడ్డారు.
Comments
Post a Comment