ఆ ఇంట్లో నివసించడం ధర్మం కాదు..ఖాళీ చేయండి: చంద్రబాబుకు అంబటి సూచన

టీడీపీ అధినేత చంద్రబాబుకు వైసీపీ ఎమ్మెల్యే అంబటి రాంబాబు సూటి ప్రశ్న వేశారు. తాడేపల్లిలోని వైసీపీ కేంద్ర కార్యాలయంలో ఈరోజు ఏర్పాటు చేసిన విలేకరుల సమావేశంలో ఆయన మాట్లాడుతూ, ఐదేళ్ల క్రితం రాజధాని అమరావతి ఏర్పడిందని, దాన్ని అభివృద్ధి చేస్తానని చెప్పిన చంద్రబాబు సొంత ఇల్లు ఎందుకు కట్టుకోలేకపోయారు? ఏమైనా అభ్యంతరాలు ఉన్నాయా? అక్రమంగా నిర్మించిన లింగమనేని గెస్ట్ హౌస్ లో మీరు ఎందుకు ఉన్నారు? అని ప్రశ్నించారు.

నదీ గర్భంలో ఉన్న ఇంట్లో, అనుమతులు లేని ఇంట్లో ఎలా ఉన్నారో సమాధానం చెప్పాల్సిన బాధ్యత భారతదేశంలో సీనియర్ పొలిటీషియన్ అని చెప్పుకుంటున్న చంద్రబాబుకు లేదా? అవినీతి నిర్మాణంపై చట్టపరమైన చర్యలు తీసుకుంటే కక్ష సాధింపు చర్యలు అని ప్రచారం చేస్తారా? అని ప్రశ్నించారు. అక్రమ నిర్మాణంలో ఇంకా నివసించాలని కోరుకోవడం దుర్మార్గమైన చర్య అంటూ బాబుపై విమర్శలు గుప్పించారు. అక్రమ నిర్మాణంలో నివసించడం ధర్మం కాదు అని, ఆ ఇంటిని ఖాళీ చేసి ఆదర్శంగా నిలవాలని చంద్రబాబుకు సూచించారు